Lvov-Memarlıq incisi

Bu gün ilk olaraq sizi Şərqi Avropanın ən gözəl ve qədim şəhərlərindən biri olan Lvov şəhəri ilə tanış edirəm.

  Lvov Ukraynanın qərbində Polşa ilə sərhəd bir ərazidə yerləşir.  Avropa mədəniyyətinin incəliklərini özündə əks etdirən və hər  zaman turistlərlə dolu , hər küçəsində, hər daşında tarix olan bu şəhər  XIII əsrin ortalarında  Daniel Qaliçkiy tərəfindən qurulmuş və onun
oğlu Lvanın şərəfinə adlandırılmışdır.

 Əgər siz XIII-XX əsrlərə aid məbədlər, kilsələr və qədim arxitekturaya malik digər abidələri görmək istəyirsinizsə, onda yolunuzu bu möhtəşəm şəhərdən salmağa dəyər. Lvov öz unikallığı, gözəlliyi və təkrarolunmazlığı ilə nəinki  Ukrayna şəhərləri arasında hətta bütün Şərqi Avropa şəhərləri arasında xüsusilə fərqlənir.  Şəhərin mərkəzi XVI-XVIII əsrdə qurulmuş bazar meydanıdır. Burada yerləşən 44 binanın hər birinin özünəməxsus təkrarolunmaz əfsanəsi və  tarixi vardır. Elə buna görə də Mərkəzi hissə UNESCO-nun “Dünya mədəni irs siyahısınna” daxil edilmişdir.

Şəhərin ən gözəl  katolik  kilsələrindən biri  Latın kilsəsidir(Латинский Кафедральный Собор св. Марии), İntibah dövrünə aid, XIV əsrə məxsus bu kilsənin tilkilməsində qotik və barok üslubundan istifadə olunmuşdur .

Lvov arxitekturasının xüsusilə fərqlənən memarlıq abidələrindən biri də 1740-ci ildə tikilmiş  Dominikan kilsəsidir. Arxitekturanı yaxşı başa düşənlər, Kilsəyə baxdiqda Fransız memarlıq üslubunun təsirini o dəqiqə hiss edir.

 Müqəddəs Elizabet kilsəsini görmədən bu şəhəri əsla tərk etməyin.

Lvov şəhərində bir neçə opera binası var, lakin bunlardan ən məşhur olanı Salomi Kruşelnitska adına Opera teatrıdır ki, bu opera teatrı Avropanın 3 ən gözəl opera binasından biri hesab olunur.  Binanın əzəməti , strukturu, bol dəbdəbəli daxili və xairci görünüşü həqiqətən də görənləri  valeh edir.  

 Lvovun məşhur yerlərindən biri də “Yüksək qala”dır. Dəniz səviyyəsindən 413 metr yüksəklikdəki dağda yerləşən bu ərazidən şəhəri seyr etmək insana ayrı bir ləzzət verir.

 Silah həvəskarı olanlara şəhərin “Arsenal” adlanan  və böyük kolleksiyası olan silah muzeyini gəzməyi də məsləhət görərdim.  Muzeyin yerləşdiyi binanın ayrıca bir gözəlliyi və marağlı tarixi vardır.

Lvov Ukraynanın digər şəhərləri ilə müqayisədə Qərbə daha yaxın yerləşir, elə buna görə də sovet tipli binalara burada daha az rast gəlinir.  Şəhərdə  Rusiyanın deyil Polşanın təsiri çox tez hiss olunur. Ölkənin digər şəhərlərindən fərqli olaraq, burada rus dilində danışan vətəndaşlara rast gəlmək çətindir.