Avropanın ən moda şəhəri-Milan

Milan elə bir şəhərdir ki, turistlər burada tez tez olur lakin şəhəri sonuna qədər  heç vaxt görə bilmirlər.  Şəhər özü özlüyündə çox gözəldir,  tursitik yerləri  isə xüsusilə diqqətə layiqdir. Duomo kilsəsini və La skala teatrnı gördükdən sonra turistlər İtaliyanın digər şəhərlərini, Venesiyanı, Florensiyanı görmək üçün axın edirlər. Şəhərin tarixi bizim təsəvvür edə bilməyəcəyimiz dövrlərdə,  əsrlərin dərinliyində yerləşir.

Milan özünün modası, mətbəxi, operası, kilsələri,  intibah dövrünə aid qalası və Leonardo Da Vinçinin “Son axşam yeməyi” freskosu ilə turistlərin diqqətini cəlb edir.  Bundan əlavə Milan ölkənin əsas maliyyə mərkəzlərindən biri və ən böyük şəhərlərindəndir.

Milanın turistik yerləri arasında ən önəmlisi Duomo kilsəsidir. Bu kilsənin mövcudluğu ilk Milan  hersoqu  III Jan Qaleatskeyo  Viskontinin adı ilə bağlıdır. Kilsənin tikintisinə 1386-ci ildə bşlanılmış və hələ də sona çatdırılmamışdır. Duomo kilsəsi İtaliyanın ikinci ən böyük kilsəsidir. Viskonti  İtaliya kralı olmaq üçün  ailənin ən güclü namizədlərindən biri idi.  Mövcud kilsənin  ölçülərinin  bu təntənəli  tacqoyma mərasimi üçün uyğun olmayacağını hesab edən Viskonti yeni bir kilsə inşa etdirməyi qərara alır. Lakin 1402-ci ilə o vəba xəstəliyinə tutulur  və vəfat edir. 1927-ci ildə isə kilsəyə  bronz qapılar qoyuldu.

Kilsənin ən dəyərli yeri  müqəddəs Karla Borrome türbəsidir. Kilsənin damı da gözəl və unikaldır. Burada muzeydəki kimi gəzə və möhtəşəm mənzərəni seyr edə bilərsiniz. Əgər şəhəri gəzmək üçün vaxtınız azdırsa onda bütün zamanınızı burada keçirə bilərsiniz, çünkü buradan bütün şəhəri seyr etmək mümkündür.

Milanda növbəti görülməsi  vacib olan yer Santa Mariya della Qrazie kilsəsidir. Özünün şah əsərlərindən birini Leonardo Da Vinçi bu kilsənin arxa divarında çəkmişdir. O zamanlarda bura dominikan kilsəsi idi. 1943-cü ildə binaya bomba düşdü. Bunun nəticəsində Kilsənin damı  və bir divarı dağıldı amma Məşhur əsərin çəkildiyi divara bir zərər dəyməmişdi.  Kilsədən bir neçə addım uzaqda elm və texnika muzeyi yerləşir, burada rəssamın ixtiraları və layihələri vardır.

Şəhərin daha bir turistik yeri Sforza qalasıdır. 

Burada Mikelancelonun tamamlanmamış “Pieta” əsəri yerləşir. Dünyaca məşhur heykəltəraş bu əsərini yaradarkən 90 yaşında idi. Onun ağlı yerində olsa da,   artıq əlləri qocalmışdı. Bu əsər  ağır təsir bağışlayır.

 Sforza qalasının mərmərdən olan zalları hal-hazırda muzey kimi istifadə olunur.

Bütün bunlardan əlavə Milanda çoxlu muzey və qalereyalar görə bilərsiniz.  Bir vaxtlar Napoleon və Jozefino Boqarnenin yaşadıqları Real villası da Milan şəhərində yerləşir. 

 Burada şəhərin küçələrini gəzərkən tarixin qədim izləri sizi müxtəlif dövrlərə aparacaq. Bir birindən gözəl memarlıq inciləri, kilsələr, qədim  küçələr, dadlı mətbəx, gülərüzlü insanlar sayəsində Milan sizin ən sevimli şəhərinizə çevirəcək.