Avropanın içərisində yerləşən Şərq şəhəri

Həqiqətən də dünyada məscidlərin, katolik və pravoslav kilsələrinin, sinaqoqların bir-birinə yaxın ərazidə yerləşdiyi yerlər azdır. Əgər bu şəhər  Qərblə Şərq mədəniyyətinin və dinlərinin birləşdiyi Avropa şəhəridirsə onda çox güman ki söhbət Sarayevodan gedir. (Sarayevo-Bosniya və Hersoqovinanın paytaxtı)

Məruz qaldığı ağır dağıntılardan sonra   son on il ərzində Sarayevo çox dəyişilmişdir. Bu balaca ölkənin paytaxtı qərbi və mərkəzi Avropadan olan turistlərin daim diqqət mərkəzində olmuşdur.

Bosniya və Hersoqovinada turistlərə təklif oluna biləcək görməli yerlərin və abidələrin əksəriyyəti bu şəhərdə yerləşir. Şəhər tarix

boyu Bizansın, Osmanlı imperiyasının, Romanın və Avstriyanın tərkibində olmuşdur. Hər bir dövlət yerli mədəniyyətin,adət-ənənələrin, dini baxışların, memarlığın üzərində silinməz izlər qoymuşdur. Sarayevonu gəzmək, onun tarixi boyu gəzinti deməkdir. Tarixi yerləri, zəngin mədəniyyət abidələrini sevənlər üçün bu şəhər cənnət kimidir. Bir çox qədim binalar bu dağlıq ölkənin  ağrı və fırtınalarla dou tarixinə şahidlik etmişdir. Ölkənin iqtisadi və mədəni mərkəzi olan Sarayevonun  əhalisi  600000 nəfərdir.

Sarayevonun ilk adı olan Bosnavarın əsası hələ 1263-cü ildə qoyulmuşdur. Yaxşı saxlanılmış Şərq görünüşü  və İslam üslubunda tikilmiş rəngarəng binalarına görə bu şəhəri Avropanın içərisində yerləşən Şərq  şəhəri adlandırırlar. O Avropanın Yerusəlimidir. Deyirlər Allahin evi hər bir dində müqəddəs hesab olunur. Elə buna görə də Sarayevo müqəddəs şəhərdir.  Şəhərin ən gözəl və diqqət çəkən məscidləri”Beqavo camiya” və “Çarevo Camiya”-dır. Birincisi Osmanlı dövründə tikilmiş  XV əsrə aid şəhərin ən böyük məscidi hesab olunur. İkincisi isə Sarayevonun ən gözəl və əzəmətli məscidi hesab olunur və şəhərin memarlığına əvəzolunmaz bir şərq üslubu  qatır.

Sarayevonun dar küçələri, çoxsaylı məscidləri, mənzərəli türk bazarı, fərqli memarlığı gələn turistlərin heyranlığına səbəb olmaya bilmir.. Lakin 1992-ci ildə olan vətəndaş müharibəsi  şəhərin memarlığı üzərində silinməz izlər qoymuş, bir çox abidələr dağıdılmışdır.

Şəhərdə xristianların daha çox olduğu şərq hissədə, XX əsrin sonlarında baş vermiş vətəndaş müharibəsinin vurduğu ziyandan sonra  belə iki qədim kilsə öz qədim gözəlliyini saxlamağa nail olmuşdur. Bunlardan biri 1478-ci ildə əsası qoyulmuş müqəddəs Mixayl və Qavril kilsəsi ,  digəri isə 1863-cü ildə inşa edilmiş müqəddəs  Boqorodic kilsəsidir. Buradakı  əksər binaların üzərində Avstriya mədəniyyətinin təsiri hiss olunmaqdadır. Milli kitabxana, muzeylər və yuxarıda adını çəkdiyimiz ən gözəl kilsələr buna misal ola bilər. Şəhərin elə bu hissəsindəcə  1566-cı ıldə tikilmiş  qədim sinaqoq vardır. Bu gün orada  yəhudi muzeyi yerləşir.

Bosniya və Hersoqovinada turistlərin daha çox getdikləri  yer Neretva çayı üzərində salınmış    qədim və məşhur Mostare körpüsüdür.  1567-ci ildə tikilmiş və hazırda UNESCO’nun mədəni irsi siyahısına daxil olan körpü dünyada daşdan hazırlanmış ən böyük tağ körpüdür.