Avstraliyanın ən məşhur və "qədim” şəhəri-Sidney.

Sidney, avropalıların Avstraliyada məskən saldığı ilk ərazidir. Şəhərin əsası 1788-ci ildə qoyulmuş və Britaniya lordu Sidneyin şərəfinə adlandırılmışdır. Sidney Avstraliyanın cənub-şərqində Tasman dənizinin sahilində yerləşir.  Bir neçə cümlə Avstraliya haqqında: Avstraliya İttifaqı cənub yarımkürəsində  yerləşən Avstraliya materikini, Hind və Sakit okeanlarda  olan bəzi adaları və Tasmaniya adasını əhatə
edir. Ərazisinə görə dünyanın altıncı böyük  dövləti olmağına baxmayaraq, burada əhalinin sıxlığı çox aşağıdır.  Avstraliya altı ştatdan ibarətdir.  O, inkişaf etmiş, güclü  iqtisadiyyata malik ölkələrdəndir.  Avstraliyanın əsas əhalisini Britaniya və İrlandiyadan gələnlər təşkil edir. Paytaxtı Kanberradır.

 Sidney qitənin ən böyük şəhəri,  həm də əsas iqtisadi mərkəzi hesab olunur.  Şəhərin əhalisi 4,5 milyona yaxındır. Dünyanın ən gözəl limanlarından olan Sidney, eyni  zamanda dünyanın ən çoxmillətli şəhərlərindən biridir.  Əksər hallarda Xaricilər bu şəhərə həmişəlik qalmaq  məqsədilə gəlir. Şəhərin sahil hissəsini çimərliklər əhatə edir. Sidney  Avstraliyanın əsas kurort şəhəridir. Şəhərdə turistlər üçün maraqlı  olacaq yerlər çoxdur: Avstraliya muzeyi, Avstraliya Milli dəniz Muzeyi, Sidney Opera teatrı , Sidney rəsədxanası, kraliça Viktorianın evi,  Harbor Bric mostu və s.  Sidney opera teatrı dünyanın ən məşhur teatrlarından biri və təkcə Sidneyin deyil bütün Avstarliyanın əsas simvoludur. 

Qu quşuna bənzəyən unikal xarici qruluşu, qeyri-adi formada təşkil olunmuş dam örtüyü  sayəsində Sidney opera teatrı müasir dünyanın ən  nadir və görkəmli binalarından biridir. Bu möhtəşəm memarlıq abidəsinin arxitektoru Danimarkalı Yorn Utzon omuşdur. O, 1957-ci ildə Opera binasının tikilməsi üçün keçirilən Beynəlxalq  tenderi qazandı. Tikinti 1973-ci ildə sona çatdırıldı və açılış Kraliça Elizabeta  tərəfindən həyata keçirildi.

Harbour Bric körpüsü dünyanın ən böyük polad körpülərindən biridir. Bu körpü Sidneyin əsas memarlıq abidələrindən biri hesab olunur, onun tikintisi 1932-ci ildə başa çatmışdır. Xarixi görünüşünə görə yerli əhali bu körpüyə “köhnə asılqan” deyir.  Sidneyin ən böyük körpüsü olan Harbour Bricdən şəhərə gözəl  və heyranedici mənzərə açılır. Körpünün uzunluğu 1150 metrdir. O şəhərin Şimal və Cənub hissəsini  birləşdirir.

 Sidney rəsədxanası  Sidney yaxınlığındakı dağlarda yerləşir. Bu rəsədxana Dünyanın ən əsas astronomik mərkəzləri sırasına daxildir. 

O, Avstraliyanın ən qədim rəsədxanası və əsas elmi abidəsidir. 1858-ci ildə inşa edilmişdir. Rəsədxananın daxilində Elektrik stansiyası muzeyi də yerləşir.

Sidney qülləsi də şəhərin əsas turistik yerləri sırasındadır. Şəhərin mərkəzində yerləşən qüllənin hündürlüyü 305 metrdir. 

Qüllə 3 hissədən ibarətdir: birinci hissədə siz 250 metr hündürlükdə yerləşən üstü örtülü zaldan bütün şəhəri seyr edə bilərsiniz. Bundan 18 metr hündürlükdə üstü açıq, döşəməsi şüşə olan zal yerləşir. Qüllənin əsas hissəsində isə 220 nəfərlik restoran fəaliyyət göstərir.

İnsana elə gəlir ki, Sidney kimi müasir abidələri olan modern şəhərdə Orta əsrlərin qot üslubunda olan  abidəyə rastlamaq mümkün deyil. Lakin belə deyil! Sidneyin tam mərkəzində, Avstraliyanın ən böyük kilsəsi olan və qot üslubunda tikilmiş Müqəddəs Mariya kilsəsi yerləşir. Kilsə gözəl xarici quruluşa malik olması ilə fərqlənir. 1821-ci ildə tikintisi başlanmışdır,  fasilələrlə davam edən tikinti nəhayət  2000-ci ildə sona çatdırılmışdır.